جموں ، 21/ستمبر (ایس او نیوز /ایجنسی) کانگریس صدر ملکارجن کھرگے ہفتہ کے روز جموں پہنچے، جہاں انہوں نے پارٹی کے امیدوار اور جموں و کشمیر کے سابق نائب وزیر اعلیٰ تارا چند کی انتخابی مہم میں حصہ لیا۔ اس موقع پر ایک پریس کانفرنس کے دوران، انہوں نے بی جے پی اور وزیر داخلہ امت شاہ پر سخت تنقید کی۔ کھرگے نے پارٹی کی پوزیشن کو مستحکم کرتے ہوئے موجودہ حکومت کی پالیسیوں پر سوالات اٹھائے۔
کانگریس صدر کھرگے نے کہا، ’’بی جے پی کا جھوٹ بولنے کا سلسلہ بدستور جاری ہے۔ ہم نے جموں و کشمیر کے عوام کے لیے سات اہم وعدے کیے ہیں، جن میں سب سے بڑا وعدہ ریاستی درجہ کی بحالی ہے اور ہم اس کے لیے ہر ممکن کوشش کریں گے۔‘‘
انہوں نے مزید کہا، ’’لوک سبھا انتخابات کے دوران ہم نے ذات پر مبنی مردم شماری کا وعدہ کیا تھا اور یہاں بھی ہم ذات پر مبنی بنیاد پر مردم شماری کرائیں گے۔ اس کے ذریعے او بی سی (پسماندہ طبقات) کے حقوق کو یقینی بنایا جائے گا، تاکہ عوام کو ترقیاتی منصوبوں کا بھرپور فائدہ پہنچے۔‘‘
بی جے پی کو تنقید کا نشانہ بناتے ہوئے کھرگے نے کہا، ’’بی جے پی کے لوگ جھوٹے دعوے کرتے ہیں کہ ہم ذات کی بنیاد پر ملک کو تقسیم کرنا چاہتے ہیں، حالانکہ حقیقت اس کے برعکس ہے۔ جھوٹے دعوے کرنے میں وزیر داخلہ (امت شاہ) سب سے آگے ہیں، جو بعد میں اپنے دعوؤں کو ’جملہ‘ قرار دیتے ہیں۔ کانگریس کے تمام وعدے حقیقت پر مبنی ہیں اور ہم انہیں پورا کریں گے۔‘‘
جموں و کشمیر میں امن و امان کی صورتحال پر سوال اٹھاتے ہوئے کھرگے نے کہا، ’’بی جے پی دعویٰ کرتی ہے کہ ریاست میں امن ہے لیکن واقعات اب بھی پیش آ رہے ہیں۔ آپ نے جموں و کشمیر کے لیے کیا کیا؟ ان کے پاس ان سوالات کا کوئی جواب نہیں ہے اور نہ ہی ان کے پاس کوئی ٹھوس ایجنڈا ہے۔ بی جے پی کے رہنما ہمارے قائدین کے خلاف توہین آمیز زبان استعمال کر رہے ہیں لیکن وزیر اعظم مودی خاموش ہیں۔‘‘
کھرگے نے مزید کہا، ’’بی جے پی کے لوگ آزادی کے وقت بھی چھپے رہے، جبکہ ہمارے رہنماؤں نے ملک کی آزادی کے لیے اپنی جانیں نچھاور کیں۔ گاندھی جی، اندرا گاندھی، اور راجیو گاندھی کی قربانیاں اس بات کی گواہ ہیں کہ کانگریس نے ملک کی تعمیر میں کتنی محنت کی۔‘‘
انہوں نے کہا کہ جموں و کشمیر کی معیشت سیاحت پر منحصر ہے اور کانگریس سیاحت کو فروغ دینے کے لیے سازگار ماحول فراہم کرے گی۔ کھرگے نے یقین ظاہر کیا کہ کانگریس اس بار انتخابات میں امید سے زیادہ نشستیں حاصل کرے گی۔